Wasu fusatattun 'yayan jam'iyyar PDP a karamar hukumar Qua'an Pan da ke jihar Filato sun lakadawa shugaban karamar hukumarsu duka lokacin taron gudanar da zaben fidda gwanin wanda zai tsayawa jam'iyyar ta su takara a zaben kananan hukumomi mai zuwa. Rahotanni sun ce, wasu daga cikin wakilan da aka hana shiga dakin taron da aka yi zaben ne suka kutsa kai inda suka afkawa shugaban karamar hukumar Christopher Audu bayan an bayyana cewar shi ya lashe zaben. Fusatattun 'yayan jam'iyyar sun yi wa Audu dukan kawo wuka saboda zargin cewar ya shirya magudi domin samun nasara ne, shi ya sa aka hana su shiga zaben. Bayanai sun ce su ma jami'an hukumar zabe ta jihar da suka je sanya ido ba su tsira ba, domin kuwa wasu daga cikin su sun gamu da fushin wakilai wadanda suka taba lafiyarsu. Ya zuwa yanzu dai jam'iyyar bata ce uffan ba dangane da lamarin.
📷 Daily Trust